ఆకాశపు రాణి.. అని ఏ విమానాన్ని అంటారో తెలుసా?

ఆకాశంలో ప్రయాణించే విమానాల్లో అద్భుతమైన, ప్రత్యేకమైన గుర్తింపు పొందిన విమానం ‘బోయింగ్ 747’. ముందు భాగంలో ఎత్తుగా ఉండే ఈ విమానాన్ని ప్రపంచవ్యాప్తంగా విమాన ప్రియులు ఎంతో ప్రేమగా ‘క్వీన్ ఆఫ్ ది స్కైస్’ (ఆకాశపు రాణి) అని పిలుచుకుంటారు. ఐదు దశాబ్దాలకు పైగా విమానయాన రంగాన్ని ఏలిన ఈ విమానం సృష్టించిన చరిత్ర అంతా ఇంతా కాదు.

విప్లవాత్మక బోయింగ్ 747
బోయింగ్ సంస్థ రూపొందించిన ఈ విమానం 1970లో మొదటిసారిగా ప్రయాణికులకు అందుబాటులోకి వచ్చింది. అంతవరకు ప్రపంచం చూడని అతిపెద్ద విమానంగా ఇది రికార్డు సృష్టించింది. మధ్యలో రెండు వైపులా దారులు ఉండే మొదటి వైడ్-బాడీ వాణిజ్య విమానం ఇదే కావడం గమనార్హం. దీని భారీ పరిమాణం, దూర ప్రయాణాలను సులభతరం చేసే సామర్థ్యం ఆ కాలంలో ఒక విప్లవాత్మక మార్పు అని చెప్పవచ్చు. 

‘ఆకాశపు రాణి’ అని ఎందుకంటారు?
అప్పట్లో ఉన్న అన్ని ప్రయాణికుల విమానాల కంటే ఇది చాలా పెద్దది. అందంగా డిజైన్ చేశారు. దీని ముందు భాగంలో ఉండే పై అంతస్తులో కొన్ని విమానయాన సంస్థలు సోఫాలు, కాక్‌టెయిల్‌ బార్లతో కూడిన లగ్జరీ లాంజ్‌లను ఏర్పాటు చేశాయి. ఈ విమానం కలిగి ఉండటాన్ని ఎయిర్‌లైన్స్‌ గొప్ప ప్రతిష్ఠగా భావించేవి. అందుకే దీనికి ‘క్వీన్ ఆఫ్ ది స్కైస్’ అనే పేరు స్థిరపడిపోయింది.

చరిత్రను మార్చేసి..!
ఈ విమానం రాకతో అంతర్జాతీయ ప్రయాణాల ఖర్చులు గణనీయంగా తగ్గాయి. ఎక్కువ మంది ప్రయాణించే వీలుండటంతో సామాన్యులకు సైతం విమాన టికెట్లు అందుబాటులోకి వచ్చాయి. అమెరికా అధ్యక్షుడి అధికారిక విమానం ‘ఎయిర్ ఫోర్స్ వన్’తో పాటు నాసా స్పేస్ షటిళ్లను మోసుకెళ్లడానికి కూడా దీన్నే వాడేవారు. 54 ఏళ్ల సుదీర్ఘ ప్రస్థానం తర్వాత 2023లో బోయింగ్ దీని తయారీని నిలిపేసింది. మనదేశంలో ఎయిరిండియా తన చివరి బోయింగ్ 747 విమానానికి 2024 ఏప్రిల్‌లో ఘనంగా వీడ్కోలు పలికింది.